قصة أشرف مع الجن قصة رعب – الجزء 2

قصة أشرف مع الجن قصة رعب – الجزء 2

قصة أشرف مع الجن – قصة رعب –

الفصل الأول من الجزء الثاني من القصة

المهم داك الفقيه هو لي معانا دابا فدار مصبح وهو يقرا وكيرش عليها فواحد الما ولاكن والو داك الفقيه فحال لي عيا وقاليهم بلي حالتها غريبة وهي حالتها ماكاين لا غريبة لا والو غير هو ضعيف و صافي وقال بلي كاين واحد الفقيه فاالمقابر ديال “المضيق”

هاداك هو الي يقدر ينفعنا المهم قال خليوها ترتاح دابا و مشا بحالو بقينا معاها حنا موراها بشي ساعة ديال الماكانا وهي تفيق عادي كاتقول فين انا كلشي كيهدي فيها كيقولوليها غير زهقتي وطحتي وغيبتي ماكاين والو وحنا كنا شاعلين داك الساعة القرآن فالتلفازة قالت نقصو عليا من ديك التلفازة عاد تكلمو معايا ..

كلشي استغرب حتا واحد ماعارف دابا واش كيتكلمو معاها هي شخصيا اولا كيتكلمو مع شي جن المهم انا صراحة تخلعت شوية وفنفس الوقت كانقول اشنو غايطرا كاع ياك داكشي لي كنت كانقلب عليه جا لحتا لعندي لاكن جا عن طريق عائلتي وهادشي لي ماحملتوش..

المهم هي ناضت عادي وقالت فيا الجوع ومشات للكوزينة وكلشي ساكت شوية رجعات و فيدها واحد الخبزة حافية وكاتاكل فيها بواحد الشراهة بحال لي ماكلاتش هادي 50 عام المهم الاستغراب خيم على الدار ديك الليلة كلشي كيشوف فيها وماعارفينش معامن كانتعاملو ولكن كولشي كان كيتكلم معاها بحال الا ماطاري والو واخا علامات الاستغراب باينين على كل واحد فينا المهم جا الواليد مع 11 ديال الليل من الخدمة يالاه دخل وهي تشوف فيه بواحد الشوفا ديال الحقد,

قالتليه نتا ماكانحملكش بدا كيضحك قاليها سيري تنعسي حسن مانجي نعسك بشي طرشة هو قالها ليها من باب الضحك وهي بغات تلصق فيه كاتقوليه و ا اجي جرب باش نخرج عليك بقا كيضحك ودخل بحالو لبيتو وهو يتبعو داك خالي ليكان معانا وباينا عاودليه كلشي المهم الواليد كان عيان مشا و تكا ماتسوق لوالو هه حسيت بيه بحال الى جاه داكشي عادي ..

الفصل 2 من الجزء 2 من القصة

المهم ضربات داك 12:30 ديال ليل قالت الواليدة بلي خصنا نعسو كل واحد يشد بلاصتو ..

خالتي طبعا كاتبات معانا فبيتنا انا و خويا الصغير و خالاتي لاخرين وخالي قررو باش يباتو معانا تحسبا لشي حاجة ماشي هي هاديك المهم هوما نعسو فالصالة ديك الليلة صافي كلشي نعس و حتا خالتي لي تسكنات نعسات وانا ناعس فالناموسية لي حداها وبديت كانحس كاتشدني لخلعة شوية بشوية حاولت نعس لاكن والو شي 2 ساعات وانا كانتقلا عاد غفلت شوية وانا كانحل عيني لقيت بلي النهار بدا كيطلع شي شوييية اقسم بالله كانعاودليكم دابا و التبوريشة تشدني ..

شفت جوج من خالتي وحدة ناعسا حداية و لاخرا واقفة وكاتشوف فيا وكاضحاك انا فديك اللحضة حسيت بلي صافي قلبي غادي يوقف وشدني واحد البرد غريب بديت كانقرا القران ودرت على راسي المانطا وحلقي ن

نشف وكانعض يدي تحت المانطا باش نتاكد واش حلم ولا دبصح وكانطل شوييية تحت المانطا وكانلقاها باقا كاتشوف وكاضحك بغيت نتسطا شوية وهو يأدن لفجر حسيت بواحد الامان غريب طليت مرة اخرا مالقيتهاش لقيت غير خالتي ناعسا عادي ..

باقي مركزين معنا فالقصة

انا فديك اللحظة حسيت براسي عييت و الارهاق شادني حيت المدرسة وعاد ملي جيت من المدرسة طلعنا لديك المدرسة المهجورة داكشي كلو كان عامل باش غفلت حتا حسيت بالواليدة كاتفيقني مع 9 كاتقولي نوض تمشي للمدرسة …

مشيت للمدراسة وبالي مشتت كانفكر غير فداكشي لي وقعليا البارح فالليل دخلت للقسم وباقي مرفوع بنادم كيدوي معايا ماكانعرفوش شنو كيقوليا غير كانحرك راسي وصافي دخل الاستاذ والله ماحسيت بيه فوقاش دخل داير يدي على خدي وسااهي كانفكر كانقول دب داكشي لي وقعليا غانكون غير حلمت كانبغي نصبر راسي زعما كانقول مستحيل يكون حلما وانا يدي عييت نعض فيه ومأكد بلي داكشي ديال بصح المهم عيت نتسائل حتا كانسمع الصوت الديال الاستاد كيغوت بجخد قفزت من بلاصتي قاليا مالك ماكاتسمعش ؟ قلتليه سمحليا الاستاد عيان شوية وبالي ماشي معايا المهم دازت ديك 2 ساعات بخير خرجت بحالي من المدرسة .

شديت طاكسي طلعت للدار لقيت الواليدة وخالاتي كيهضرو مع خالتي كيحاولو يقنعوها باش تخرج معاهم كيقولو ليها نمشيو ضويرة ونرجعو وهوما ناويين يديوها لداك الفقيه لي فالمضيق المهم قنعوها باش تمشي معاهم وانا مابغاوش يديوني معاهم قالولي بقا مع خوك الصغير راه غاطي يبقا بوحدو المهم بقينا انا وخويا الصغير مع ديك 4 كانسمع الصوت ديال لانطيرفون قلت شكون وهي تقوليا الواليدة فتح ..

فتحتليها طلعو كاملين و الوضع عادي جبدت على خالتي لكبيرة قلتليها شنو وقع قالتلي بلي داك الفقيه مسافر شي 3 يام عاد يرجع صافي الامور بقات هكاك وخالتي الصغيرة لي تسكنات لحد الان مادارت حتا حاجة غير عادية كاتصرف عادي لكن كلشي داير بحسابو ليها و شوية جاتني فبالي نقول نالواليدة داكشي لي شفت البارح لاكن فكرت بلي راه ماغاتيقنيش طبعا وخليت داكشي عندي ..

الفصل 3 من الجزء 2 من القصة

صافي بقات الامور هكاك حتا لديك 8 ديال الليل خالاتي كلهم مشاو وخالي حتا هو بقينا غير انا وخالتي الصغير و الواليدة وخويا الصغير و الواليد لي فالخدمة ماكيجي حتا ن 11 ديال الليل اولا 12 ..

المهم ضربات داك 9:30 و الواليدة تشعل التلفازة وشعل معاها القران خالتي قالت طفيه الواليدة قاتليها لا ماغانطفيهش ويدا ماعجبك حال ضرب راسك مع الحيط حيت عندي الواليدة المسائل بحال هادو ماكاتخافش منهم .. ماعلينا خالتي ملي سمعتها قالت هكاك سدات على ودنيها وبدات كاتقوليها طفيييييي وا طفييييي والو الواليدة كاتزيد فالصوت و هي تطيح وبدات كاتركل الواليدة شدات ليها فراسها وبدات كاتقرا عليها اية الكرسي وكاتعاودها انا ماعرفت ماندير غير كانشوف بعيني ..

المهم بدات تقرا تقرت تقرا حتا تهدنات وبقات ناعسا هزيناها انا و الواليدة وديناها نبلاصتها وبقات هكاك مهدنة شوية بشي ساعة موراها مع ديك الجوايه ديال 10:30 فاقت قالت بلي خاصها تعطي لشي وحدين يشربو كانقولوليها شكون هادو كاتقولينا صحابي فيهم العطش غادي نهبط نعطيهم يشربو ( فالكراج ديال الدار) والو سدات عليها الواليدة الباب ديال الدار وخلاتها كاتغوت غا بوحدها حتا نعسات .. المهم جا الواليد مع 12 لقا كلشي عادي ..

قالينا ماوقع والو كلشي مزيان ؟ قلناليه بلي راها شوية دابا و راها نعسات.. صافي الواليدة قالتلي انا وخويا الصغير مشيو تنعسو لاكن قررنا انا وخويا الصغير مانعسوش معاها نعسنا انا وياه فالصالة حيت ماخسنيش نشوف شي حاجو لي غادا تخليني فايق و انا قاري غدا مع 8 ديال الصباح ..

المهم نعسنا حتا حسيت بالوالدة كاتفيقني مع 8 صافي فطرت و لبست حوايجي ومشيت للمدرسة … طلاقيت مع صحابي نساوني شوية كانضحكو كانشطو وكانت عندنا الرياضة من 10-12 لعبنا شوية كورة المهم بدلت داك الروتين ديال الدار ..

صافي مع 12 رجعت بحالي كي العادة شديت طاكسي ومشيت بحالي وصلت للدار لاكن هاد المرة مادخلتش م الباب ديال الدار دخلت من الكاراج حيت الباب ديال الدار لقيتو مسدود من داخل المهم دخلت من الباب ديال الكراج ماتصوروش شنو لقيت ..

لقيت بلي الحيوط ديال الكراج كلو مرسوم بشي وجوهة و الله ماتقد تكمل فيهم الشوفى و مرسومين بالفحم حيت الحيط بيض انا فديك اللحظة جاني واحد الخوف غريب وليت داكشي لي كنت كانقول بلي هما بحالنا بديت كاننفيه وبديت كنحس بلي البحر كبر عليا كانقول فنفسي ادا بقيت هاكا نقدر نتسطى المهم طلعت فالدروج ب 120 كم فالساعة فتحت الباب كانلقا خالتي لي مضروبة و الواليدة كالسين كيفطرو و هي تقوليا خالتي اهلا اشرف جيتي ؟

كيجاك الرسم ديالي فالكاراج زوين ؟ ( حيت هي اصلا كانت فمعهد ديال الفنون الجميلة وكاترسم مزيااان) قلتليها اه ماعاندي مايتسالك كاترسم مزيان وتكمشت بحالي فبيتي الوالدة كانت ماشافاتش داكشي حيت شفتليها فوجهها الاستغراب كان باين عليها شوية ..

الفصل 4 من الجزء 2 من القصة

المهم دخلت لبيتي و بدلت عليا وشعلت البلاي باش نلعب شوية وهي دخل خالتي قالتلي دير داك اللعبة ديال Resident Evil حيت كاتشوفني كانلعبها بزاف قلتليها

لا ناوي نلعب شوية ديال الكورة قالتلي لا دير هاديك انا مازدتش معاها فالهدرة و درتها وكانلعبليها و انا خوفان وهي كضحك و الملامح ديال وجهها مبدلين كانحس بلي ماشي خالتي لي كالسا حدايا .. شوية و انا نسمع الصوت ديال لانطيرفون رتحت شوية فتحات الواليدة الباب و كانسمع الكلام فالدروج صوت خالي وشي واحد معاه دخلو علينا كانشوف خالي ومعاه واحد خينة عندو واحد اللحية كبيرة صابغها بالحنة و وجهو مهيب هي شافتو بدات كاتقول قوليه يخرج علياااااا هادا لا هادا لا ..

ماتصوقوش ليها قاليا ولدي نتا خرج من البيت و هو يدخل هو وخالي وسدو الباب و الشراجم مشا قاصدها كيقرا عليها القران و هي كاتغوت و واحد الصوت عندها و الله مانقد نوصفو ليكم بحال داكشي ديال الافلام المهم كيقرا فالقران بالجهد و اناىغير من مورا الباب كانسمع و صافي شوي كانسمع الصوت ديال الضرب بدا كيضربها بالسمطة و ديك الصوت كيقوليه انا غادي نخرج غير ناضربش كيقوليه وا يالاه هو دابا كيقوليه لاخر و الله وضربتيني مانخرج و ديك الشيخ كيعطيه عاود وكيقرا عليه القران المهم بدا كيصارعو شي مدة ديال ساعة هكاك حتا كانسمعو داك الجن كيقول …

تتمت القصة في الجزء القادم كونو على القرس …
القصة عاد بدات فالتشويق

جميع أجزاء القصة
الجزء الأول من القصة
الحزء الثاني من القصة

قصة أشرف مع الجن – قصة رعب – 9issa.com

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *