قصة – قصتي معا الرجل لي ماشي من عالم الأنس – الجزء 1 –

قصة – قصتي معا الرجل لي ماشي من عالم الأنس – الجزء 1 –

قصة – قصتي معا الرجل لي ماشي من عالم الأنس

الجزء الأول قصتي معا الرجل لي ماشي من عالم الأنس

قصة اليوم من عالم الجن … نخليكم مع الأخت باش تبدا ليكم في سرد أحداث قصة اليوم استمتعو


قصتي لي غنعاود ليكوم دابا قصة غرييييييبة جدا وقعات ليا عماين هادي وباقا مأترة فيا بزااااااف قصة لي الى تفكرتها كنمرض حيت مرضاتني فحياتي حيت الواقعة لي وقعات ليا غير طبيعية ابدا ابدا انا براسي مكنتش تيقت داكشي لي كان تيوقع ليا معا داك الراجل لي ماشي طبيعي خلاني كنشك فراسي واش يكما غير كنحلم وكنقول واقيلا راه حلم هادا وغنفيق منو ولي تيزيد امرضني لي تنعاود ليه هادشي تيقول ليا واقيلا كنتي تتحلمي ولكين من بعد عاد عرفو عائيلتي بلي لي كنت تنقولو ليهوم راه بصح وماشي وهم وماشي حلموعاد تأكدو وليوم جيت باغا نشارك معاكوم هاد القصة هادي وكنتمنى منكوم تقدرو ضروفي

سميتي وفاء والعمر ديالي دابا 21 عام من مدينة الدار البيضاء عشت طفولة عاادية جدا ولكين جدة ام الاب ديالي كان كتبقا تشعود لعيباد الله وحنا مكانش عاجبنا الحال وقلنا ليه هادشي حرام وهي ماشي كانت تتسحر لناس تأديهوم لا كانت دايرة واحد المجمر وكانت تتخدم غير لبنات لي بغات تتزوج ولا لي بغات تيسر ليها شي حاجة ولي بغات تقرا مزيان …

تتبقا طلق ليها لبخور وتبقى تقول شي تخربيق وكتبقا تجبد شي خيوطة وتتبدا تدوي بوحدها قالت بلي تدوي معا الجواد مكنفهموش اش تتخربق كتبقا تكتب شي حاجة فشي وراق وتبقا دير فيهوم شي غبرة وتتعطيها ليها باش تيسر ليها الامور


وحنا ساكنين معاها فدار كيقول ليها بابا راه داكشي لي تديري فيه ممنوش راه ربي لي تيسر الامور ماشي نتي وبصح جدا كانت غير تتخربق عمرها عرفات القبلة فين جات ولكين لموشكيلا فين راه بصح كنت لي تتجي عندها كنت من بعد مدة تتزوج ولكين علاقتهوم الاغلبية متتستمرش دازت واحد المودة على هادشي مرضات بزاااف مرضات على غفلة طاحت كومة غير شي ايام توفات جداتي الله يرحمها وحتا نهار موتها الله يستر مدازش مزيان تعطلاااااااات باش تدفنات …

إقرأ أيضا : قصتي مع بنت الشوافة – الجزء 1 –


وهيا قبل لتوفا قالت للأب ديالي الى مت جمع داكشي ديالي كامل سير حرقو متخليهش عندكوم هنا قالت ليه ديه لشي بلاصة ميكون فيها تاحد وحرقو كولو وتأكد بلي مخليتي والو قالت ليه قرا شوية القرآن ومتخاف والو وملي توفات بشي 3 ايام نضت انا دخلت لداك لبيت بديت تنشوف فداكشي ديالها وتنقول معا راسي دابا فاش غينفعها هادشي لي كانت تدير وهاد الشرك بالله دابا مغينفعها فتا حاجة قلت ارا نجمع داكشي وبصح جمعت كولشي داك تخربيق فبلاصتيكا كحلا كبييرة لحت المجمر لبخور شي غبرة كانت عندها جمعت كولشي وجمع فديك الميكة نيت وحطيتها فلقنت ديال لبيت وخرجت منو وسديتو بساروت ليدخل ليه شي حد

وساروت خبيتها فبيتي وديك لميكة قلت تنديها لزبالة بلعشية حيت مزال لعزاية تيجيو وكاينين عمامي وخوالي ومبغيتش نخرجها قدامهوم صافي انا وماما وخواتاتي تلاهينا بشقا معا ظياف داك نهار ومبقيتش ديتها تال يوماين مورا داك نهار عاد قالينت بابا خاصني ندخل نجمع داكشي ديال مي ونحرقو سولتو علاش غتحرگو قاليا هادشي ‘ قالت قالت ليا ضاروري تحرگو قلت ليه راه جمعت داكشي كامل فميكا ونسيت ملحتها قاليا اش داك ليه قلت ليه مفخباريش انا قلت غير نجمعو مشا طلع يجيب للميكة لي فيها داك تشعويد عطيتو ساروت و ملقاهاش

هبط كيسولني فيناهيا قلت ليه راها لقنت قاليا مكاين والو طلعت تنشوف تنلقا لبيت لي جمعتو كامل ترووون ولميكة مكيناش قلت ليه والله تا غير هنا فاش حطيتها قاليا يكما لحتيها ونسيتي ولكين انا ملحتهاش قلت ليه لا ملحتهاش ومتأكدة تصدمت الصارحة مفهمت تا حاجة سولنا ملين دار كاملين تا حد مشافها وصف قلبنا تا عيينا ملقيناهاش ضمسنا القضية وسكتنا
من بعد شهراين ونص بلحساب على الوفات ديال جداتي تعرفت على واحد الولد…….
ياك مزال متبعين معنا القصة
وهنااااا فين غادي يبدوا بزاااف دلحوايج فـ القصة خايبين ورعب لي غنعيش خايب بزااف اكفس رعب داز عليا

الجزء 2 قصتي معا الرجل لي ماشي من عالم الأنس

من بعد شهراين ونص بلحساب على الوفات ديال جداتي تعرفت على واحد الولد صراحة زوين وعجبني وتاهوا قاليا بلي عجبتو بقينا تنهضرو لمدة 5 اشهر الى خرجت معاه تنحس براسي مرفوووعة بحال الى ماشي انا تيولي تيبان ليا غا هوا معرفتش كيفاش نشرح ليكوم ولكين بحالى كيدير ليا الطلاميس متنحسش بالعالم لي حدايا وملي تيهضر معايا تنبقا ساكتا شحال باش غير نستوعب اش قال باش نجاوبو وهوا بعد المرات فاش كنكونو خارجين متيمش معا الاماكن العامة لا تيديني لشي بلايص لي هيا فيها ناس قلاااال وتنگلسو بعاااااااد بزاف على دوك ناس بعد المرات كنت تنلاحض فهضرتو تيكول شي كليمات ممفهومينش وهادشي غير فالاشهر الاخيرة اما فاللول لا كان تيهضر

إقرأ أيضا : قصة – قصتي مع صاحب خويا – الجزء الأول –

وليت مهووسة بيه لدرجة لا تصور ولات صورتووو متتفارقش بالي نهائيا كنفكرف فيه كتر من لقياس وليت مهووسة بيه بزاااف ولكين وخا هكاك مخلوعة معرفتش مناش واحد النهار خارجين لقيتو تيتسناني فواحد البلاصة قريبة ليا فالعروبية وخااوية كلست حداه قلت ليه سلام صافي غير شفتو تاني وانا نتفلاشا راه تنترفع تنحس براسي فعالم اخر تنسااا كولشي كلست حداه تنحس بهضرتو تبدلاااات صوتو تيتبدل مفهمت ووالو شوية وهوا يقول ليا راه حياتك كاملة غتبدل معايا وقلت ليه كيفاش قاليا دابا نتي ولات عندك علاقة معانا قلت ليه مفهمتش اش كتقول

قال ليا من بعد غتفهمي راه والله منكدب عليكوم شوية شفت فعينيه بحال الى ضرب فيهوم واحد الفلاش و ومشا وتا طريقك باش تيضور راسو مفهمتهاش صافي تخلعت بزاف وليت تنقول فخاطري ايمتا غنوض نمشي بحالي تخلعت ورغما هادشي تنحس بلي شي حز شادني حداه بزز وكنحس براسي تقيييلة صاف رجعت لدار وتحد شوية جا بابا وجاب معاه شي سلعة ديال الخدمة ديااالوووو وقاليا وفاء بنتي هزي هاد سلعة ودخليها للبيت لي لفوق خاوي وداك لبيت اي خاوي كان ديال جدة صف هزيت سلعة طلعتها وحطيتها قدام داك البيت وهبط باش نحيب ساروت حيت من نهار ماتت جدا وداك لبيت غير مسدوود

جبت ساروت وطلعت حليت لبيت هزيت سلعك دخلتها معا كندخلها ونا نشوف ديك الميكة لكحلة لي جمعت فيها المجامر ولبخور ودوك الخيوطة وداكشي كامل لي كانت كتشعود بيه جدا الله يرحمها لعيباد الله تصدددددمت بزاااف قلت لا ميمكنش حيتاش فاش كنت جمعتها فاش ماتت باش نلوح داكشي خليتها فلقنت ديال لبيت تا يخرجو لعزاية ونهبطها نلوحها ولكين فاش طلعت نديها حيت بابا قاليا اري نحرق داكشي ملقيتهاش ومكيناااش وصف قلبنا عليها فاش ملقيناهاش صف سكتنا ولكين ليوم لقيتها فنفس لبلاصة فاش حطيتها وكي حطيتها ستغربت حيت لبيت كان مسدود بساروت ولفوق كاع متنطلعو ليه بقيت حايرة

هبطت عيطت لبابا قلت ليه لميكا لي جمعنا فيها داكشي ديال جدا لقيتها
قاليا فييين لقيتيها مزال،!؟
قلت ليه فين حطيتها فلبيت
قاليا اوااااه قلت ليه والله العضيم تا كاينة لفوق تاهوا مستغرررب وقاليا وكيفاش داك نهار ملقيناهاش
يكمزال متبعين معيا فالقصة

إقرأ أيضا : قصة – قصتي مع صاحب بابا – الجزء 1 –

طلع وبدا تيعيط ليا وفاااااء طلعت قلت ليه نعام قاليا فين الميكا لي قلتي لقيتيها دورت وجهي ملقيتهاش قاليا وليتي كتفلاي عليا الحماارة واش انا باك ولا گرينك تفلاي عليا وزايداها كتحلفي بالله المسخة الله ينزل عليك النعلة الى يوم الدين شبع فيا سبان ديال بصح كيسحاب ليه كدبت عليه ولكين انا اقسم بالله تا شفتها بعيني بجووووج انا متأكدة بلي شفتها مرضت داك النهار فراسي وبابا عايرني وتاهوا بابا على سبة دغيا تيبدا يعاير قلبو مفيهش المحنة كاااع

شوية طلعت تاني نشوف نتأكد وبصح ملقيتهاش وليت تنقول يكما غير تخايلت صافي بليل دخلت لبيتي نعس وراسي كان ضااارني بزاف بسباب لي وقع فداك نهار دخلني شك فراسي وليت مخربقة وصافي بغيت نعس تنسمع تاني داك تقرقيب وتنسمعو مجهد وملي تنضور تنلقاه هوا واقف وتصدددددددددددددددددمت تصدمت

ترقبو دائما جديد القصص بالدارجة المغربية , مع موقع قصة

قصص لها علاقة بالقصة :
قصة الجن العاشق – الجزء 1 –
قصة من أغرب قصص السحر وتسخير الجن والشياطين -1
قصتي مع بنت الشوافة – الجزء 2 –
قصة – قصتي مع صاحب خويا  الجزء 2
قصة – قصتي مع صاحب بابا – الجزء 2 –

قصة – قصتي معا الرجل لي ماشي من عالم الأنس- 9issa.com


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *