نصائح لي بغات تعلم كيفاش تحلون على راجلها – تخليه يحماق عليها

نصائح لي بغات تعلم كيفاش تحلون على راجلها – تخليه يحماق عليها

نصائح لي بغات تعلم كيفاش تحلون على راجلها – تخليه يحماق عليها

افينكم الحرشات .. لي ماتايعرفوش يتحلونوا .. وديما فالمشاكل بسباب قصوحيت لسانك .. جبت ليكم بوسط واعر واعر فيه نصائح خطيرة .. من تجربة واحد السيدة مزوجة كيف قدرات تأثر فراجلها ولا تيموت عليها … عطات نصائح معقولة وواعرة .. أنا شخصيا لو كنت مزوجة نطبقهم بالحرف و غانحتافظ بيهم لدواير زمان … يالاه لي بغات تعلم كيفاش تحلون على راجلها و تخليه يحماق عليها

يالله تبعو معايا هاد النصائح و ديرو بيهم بالحرف …

السلام البنات كيدايرات لاباس عليكم ، شفت بزاف د عيالات مزوجات تيتشكاو من عدم التفاهم مع أزواجهم ، واش عارفا السبب علاش راجلك تينفر منك ؟ ضروري تعرفي أن السبب منك نتي ، وماتقوليش لي أن مو ولا ختو تايحرشوه عليك ، ولا تزوجتيه زواج تقليدي و متايبغيكش ، و كذا … الخ خاصك تعرفي أ حبيبة أن راجل كيفما بغى يكون نوعو (قاصح /زايغ/ ولد مو ..) راه إلى بغيتي تخليه خاتم فصباعك و مايشوفش من غيرك تقدري ، كيفاش ؟

بحسن التعامل معاه و تحلوين و تقحبين ، سمحولي على الكلمة الأخيرة و لكن راها هيا المهمة ، ااااااه خاصك تكوني قحبة و صوبييييييصة قدام راجلك ، بقيتو فيا ، داكشي باش كتبت هادشي باش نعطيكم من تجريبتي فالزواج

انا نعاود ليكم قصة ديالي و ندوزو للنصائح

، أنا تزوجت زواج تقليدي ، الواليد لي زوجني بزز مني ، ماكنتش نحمل راجلي وكرهت راسي ، ولكن ماعندي ماندير ، هادشي كتبو عليا الله وقبلت بيه ، و حتى راجلي بوليسي و طبعو قاصح قاصح بزاف ، فالأول ديما كنا فالمشاكل و صداع كنت كانفكر فالطلاق ، ااه و لكن الواليد غايتبرا مني حيث ماعدناش شي حاجة سميتها طلاق ، فكرت مع راسي ، أنا لي ضايعا ، اللهم نحاول نكسب راجلي ونخليه يولي يحماق عليا ، وتانا بحالكم ، حشومية و كيف تانقولوا مسوسة و قاسحة شوية واخا أنا ماتانبغيش نقول هاذ الكلمة د قاسحا حيث هيا تاتناسب غير راجل أما حنا نساء حنانات واش عارفا اشنو معنى كلمة (أنثى) ، الله سبحانه و تعالى ميزنا و عطانا قيمة على الراجل ، علاش ماتستغلوش قيمتكم و شكل لي عطاكم الله و تقربو من رجالاتكم ، شحال من وحدة متايقاش فراسها و تبرك طلس نهار ومطال فداك الوجه الزين عندها و دير ليكوش لطرمتها حاشاكم غاباش تسمع كلمة ولا جوج من واحد مماسح تا قاعوا ياربي تسمح ليا ، مهم هذا موضوع آخر ، وتانهضر ومعصبة حيث هازاني النفس على بنات بلادي لي مغمضات عينيهم وماباغياش يشوفوا بلي غاديين غير للهاوية ،

نرجعوا لموضوعنا (النصائح)، كيف قلت ليكم أنا ماتانعرفش كيفاش نتعامل مع راجلي ولا كيفاش نحلي لساني معاه بحكم ماعشتش علاقات عاطفية يامات القراية (سطاج زعما ) راني سطلة فالتحلوين و التقحبين ، تانعقل تا فليلة الدخلة كنت مخلوعة بزاف و لكن تفكرت هدرت ختي لي مزوجة قبل مني و قاتلي تهدني و ترخاي و هو غايتكلف و داكشي ليدرت ، لكن ماستمتعتش نكذب عليكم ، ماعرفتش كيفاش غانتجاوب معاه ، عمرني فلوريطيت و لا قاسني شي واحد مهم ، لي بحالي غاتعيشوا هاذ اللحظة و لكن من بعد غاتعلموا وتوليو محترفات مع النصائح لي غانعطيكم . باش تعيشي مرتاحة مع راجل ويولي يهبال عليك خصك تعرفي شادة و الفادة عليه ، مع الوقت غاتعرفي عليه شنو تيبغي و شنو تيكره ،

ونبداو على بركة الله . مع النصائح لي غاتفيدك

# خصك تعرفي نقط الضعف و القوة عند راجلك ، مثلا ، أنا راجلي تيحماق على ماماه ، كاينين شي عيالات غاتبقى دابز مع مو باش تحاول تفرقوا عليها و تنفارد بيه ، لا لا غلط هاكا عاد ماغاتصعبي عليك ويولي كرهك ، علاش أ حبيبة تاطولي عليك طريق ، زيدي تقربي من مو ، أنا عجوزتي ولات تاتسطا عليا ، تانمشي عندها تانديلها الكادويات مرة ريحة مرة بليغة مرة تانديها ل عند الخياط وتانقولها هانتي أ خالتي عزلي ثوب لي بغيتي نفصلوا ليك جلابة ، عامليها بحال ميمتك ،تاتبقى ترضا عليا ، و ديما تاتبقى تمدحني قدام راجلي ، وتانشوف رضاه عليا .

ناس لي تايكره راجلك خصك تكوني عارفاهم و تفاداي تهضري معاهم و إلى غاتجبدي نحل عليك عرفيه اشنو تايبغي ياكل ، شهيوات لي تايحماق عليها و جديهم ليه ، عودي فيقي بكري ماشي تصبحي خامرة طيبي ليه الفطور ، ماشي يمشي جيعان يقول مامهلياش فيه . راجلي بحكم خدمتو كل مرة ومعاش فايق مرة 3:00 مرة 5:00 ههه مشكلة ملي جي من الخدمة كوني متأكدة غايكون مسخسخ ، ماتوقفيش لو عند الباب كي عزراين و تقوليلو خاصني زيت ، خاصني الخبز ، وراه خاصاك شي قتلة د العصا ، نن حبيبة ، يجي تبسميلو ، قولوا على سلامتك أ حبيبي ، توحشتك ، واش فيك جوع نوجد ليك ماتاكل ؟ و سدي دلقومك هههه لقالك عيان بغا ينعس قوليلوا واخا حبيبي و خليه على راحتو .

دارك ديما تكوني غاسلاها مسيقاها و معطراها ، راه عزيز عليهم نقا ، و حوايجوا ديما يكونو مصبنين مصلوحين و مطويين ، و مرة مرة شوفي لكان شي تريكو محلول خيطيه و لا شي قميجة طايرا لها عقدة صاوبيها ، مالك اش تاديري .لي يكون خدام فالدار ، ماتمشيش تجلسي حداه و تبداي تبلبلي بحالا جالسا مع صاحبتك ، شوف أ حبيبي و كون تعرف صحبتي راجلها اش جاب لها ، شوف و كون تعرف اش دارو فمسلسل سامحيني اليوم ههخ راه والله تاكاينين شي مسطيات تايديروها تاتلقى عينيها تنفخات ، كيتشوفيه خدام سيري وجديلو قهيوة هيا هاديك و كويس د الماء و حطيهم لو و قولوا الله يعاونك أ عمري و ضرقي كمارتك من حداه

ملي تكوني تنظفي دار و توصلي البلاصة لي تايخدم فيها وإياك تقاديليه وراقو ، والله تايخمجك ، وقعات ليا كنت بغيت نحداك و نضت تانجمع شي روينة د الوراق ، ظنيتو غايفرح لكن خاصم عليا علاش نقادهم ليه ، حيث تيكونوا عارفين وراقهم دير خير مايطرا باس ، مهم نتي تعرفي على حسب طبيعة راجلك كاين ليغى يفرح و كاين لي لا .

نكملو النصائح ديالنا ….

راجلك موالف ديما تيتغدا فالخدمة ، نوضي بكري و لا فالليل و جديلوا شهيوتوا المفضلة و ديريها فبواط خاص بيه و صباح سخنيها لو و عطيها لو يديها معاه ، ملي غاياكلها غايتفكرك ويبقى يبتاسم

أجي دبا لتقحبين ، ملي تهضري معاه عداك دوي معاه بحال إلى داويا مع بوعزة الخضار ، تحلوني ، لوحي لو الكلام الحلو بحال عمري ، حبيبي ، تاج راسي ، كانبغيك ، كانحماق عليك ، حياتي ، حبي ،… وزيد وزيد نتي وشطارتك كاينات لي تايحشموا ومايقدوش يقولوا هاذ الهضرة ، عادي تانا بحالكم كنت تانحشم وديما تانعيطلو بسميتو هههه لكن دبا مكاين غا حبي عمري هههه ، و الحل باش غلبت الحشمة هو ، شوفي مثلا ملي تاتبغي تدعي فصلاتك شي دعاء تيجيك فالأول صعيب تقوليه و لكن بكثرت ماتاتبقاي تردديه تاتولي حافظاه عن ظهر قلب و تقدري تقوليه بدون شعور و هاكاك بالنسبة لتحلوين ، ملي راجلك يخرج وتبقاي بوحدك فالدار ، سيري هزي تصويرتو و علقيها قدام المراية و وقفي شوفي فيها و بداي تدربي على الكلام الحلو ، داكشي لينتي ماقادراش تقوليه قدامو قوليه لتصويرتو غاتباني كيشي حمقة لكن غاتولفي ، يوميا ديريها و أقسم بالله حتى غاتولي تزعمي عليه و تكتاشفي أن فوسطك واحدة آخرى عن تجربة .

ملي يكون خارج عنقيه و بوسيه وقوليلوا غانتوحشك ، توجور تاندير هادي سيد تايدير بناقس من الخروج ههه ملي كون جالس تيتفرج تقزبي نيت و تعطري و جلسي قبالتوا و ديري راسك مامدياهاش فيه تفرجي ولا لعبي بتيليفون و لا قراي شي مجلة ولا هضر معاك ميكي ، غايعاود يهضر معاك ، قوليلو شنو !! بلاما تشوفي فيه غيتشوا مسكين و ديك ساعة نوضي جلسي فحجرو سكتيه ببوسة تلفو على القبلة .

كنتمنى تال هنا يكونو النصائح مفهومين

ملي يكون ياكل قولوا عمري بغيت انا نوكلك ، جلسي فحجرو و وكليه تيقيني غاتعزازي عليه شي نهار عرض عليك البرا وشوية تقلب كي زمان وقالك حبيبة جاتني خدمة ولا شي حاجة ، وإياك تقلقي وتغبني و تحمري فيه قوليلوا ماشي مشكل أ حبيبي مرة أخرى فيها خير ، وسيري قلي ليك شوية د السم بغيت نقول قلي ليك شوية الذرة و كوليها

شي نهار خلا سوارتو و لاشي حاجة ، عنداك تغوتي وتقوليلو وفين كان عقلك ، نتا ديما جاليهم ….. بلا بلا ، قوليلو فين آخر مرة حطيتيهم ونوضي قلبي عليهم و سدي فمك .

لي شوميز دونوي (هاكي شوفي هنا تلقاي شي حاجة زوينة riches.ma)خرجي معاه وخليه يتقداهم ليك على شهوتو ولا كان تيحشم شريهم بوحدك و تقداي اللوان لي تيبغي نهار يكون لاعب شي ماتش ، ماتش د الكورة ماشي لي فبالك شجعي الفرقة الأخرى مثلا هو مشجع الريال نتي شجعي البارصا ، واخا تكوني مافاهماش اللعب مهم نتي تبعي غا الكورة فين غاديا هههه ، و ديرو تشالنج بيناتكم لي خسر يحكم عليه الآخر ههه وهاكا غاتخلقو جو زوين ويولي يهتم بيك كيمانتي مهتمة بيه نتوما ساكنين بحدكم فالدار ياك؟ علاش ساترة راسك . تصبحي لاوية عليك زيف بحال جدة و لابسة بيجامة طويلة ت الأرض بحالا ساكنا مع جدك نن ، نوضي ديما لبسي حوايج فاضحين ، أنا ديما تالبس شي سروال مطرطق و شي ديباردور مبين لي صدري ، تايتزعط فيا ، ولا تالبس شورط و شي تيشورت فوق السرة و تانطلق شعري و شوية الماكياج و ريحتو المفضلة ، كيشوفني يجي عنقني ويشم ريحتي ، نتي وشطارتك . # ملي تكونوا تهضروا ركزي عينيك على عينو و مرة على شفايفو ماتحسي براسك تاتلقايه فوق منك و لكن ديري شوفات شهوانية ماشي شوفات عادية ._ ملي يوقع شي مشكل و يغوت عليك (عادي المشاكل بين الأزواج) ماتراديش معاه فالهضرة ، سكتي وخليه يغوت تايتفش و غاينوض يخرج ملي جي غايجي راسو يعتذر منك و ديك ساع تفششي عليه كيفما حبيتي . و شي مرات مغايعتذرش على حسب المشكل ، مهم وإياك تهربي من الفراش وتخرجي تنعسي فالصالون بحال الأفلام.

واحد الخريجة من النصائح (فايتا وقعاتلي دابزنا و خرج ملي جا مادوا ماتكلم دخل نيشان نعس ههه مشيت تقزبت و درت العطر لي تيبغي و تخشيت حداه و بقيت تانشوف فيه ههه و الله تاعضني واندمت اش جابني حداه هههه سيد جهل . جربوها غايولي يحماق عليك)

أجيو ندويو على النصائح فـ الفراش واهنا نتي وشطارتك خصك تقراي شي شوية على الثقافة الجنسية و تحاولي طبقي شي حركات جنسية على راجلك مثلا تهمسي لو فوذنيه و تعضيها لو ، تبوسيه فعنقو مهم مع المدة غاتولي عارفا المناطق لي تاتهيجو ، و ملي تكوني تحت منو قوليلو بصوت كلو حنان و رومانسية تانبغيك و متانشبعش منك ، هاذ الجملة غاتحسسو بلي راه سي سيد و سبع ديالك يولي يموت و يتسطا عليك و يهبال عليك .

أوامرو نفذيها ، قالك ماتخرجيش ، ماتلبسيش فزنقة هادي معرية ، قولوا واخا ، علاه شحال عندك من راجل ، و ماتبقايش تسمعي الكلام البايرات ، تقولك إوا صافي لهلا يحييه حتى يولي يتحكم فيا هيا لقاتو بعدا ، غاتعمر ليك راسك تاتولي سباب فطلاقك . راجلك سمعيلو و تهلاي فيه و شبعيه فيك سوا فماكلتو و لا ففراشو و غايولي يهضر غير بسميتك

لابدا من أن طرف واحد يتنازل شي شوية ، أما لا درتي ديك النخوة الخاوية و النفخة غاتلقاي راسك مطلقة و لا تيخونك .

وأخيرا ، أ حبيبة رضاي بلا طاي لي عندك وإياك تجربي شي عجب تاتولي فشي مصيبة ، راه مور زواج سبحان الله تاتولي تنفخي وتيترباو ليك المناطق لي كنتي تاضاربي معاهم بالوصفات ، بغيتي وزنك يتزاد عطيها الراحة و الماكلة الماكلة الماكلة و صافي أما باش تغلاضي و تعجبي صاحبك و دراري كوني يقينة ماشي نتي لي غاتعجبيهم راه لحمك لي عجبهم كوني متأكدة من هادي ، كبري عقلك ماشي طرمتك كلامي موجه للمثقفات . راني تانكتب وتا نحاول مانغفل ليكم والو دبا هادي 7 سنوات باش حنى مزوجين و عدنا وليداتنا و تانحماقو على بعضياتنا الله يخليه ليا. نتمنى نكون فذتكم البنات دعيو معايا
الى اللقاء في نصائح اخرى ان شاء الله

نصائح لي بغات تعلم كيفاش تحلون على راجلها – تخليه يحماق عليها – 9issa.com

لا تعليقات بعد على “نصائح لي بغات تعلم كيفاش تحلون على راجلها – تخليه يحماق عليها

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *